দীপজ্যোতি অসম
নাজানো,
ইমান মৰম কিয় লাগে তাইজনীলৈ ?
মোৰ উকা হৃদয়ৰ কোঠাৰিত
নিঃস্বাৰ্থভাৱে মৰমেৰে সজাই তোলাত
তাইজনীৰ অৱদান অতুলনীয়,
সেইবাবে চাগে ইমান মৰম লাগে ।
আই-পিতাইৰ সহস্ৰ বাধা নেওচি
মোৰ মৰমৰ সঁহাৰি জনোৱাত
তাই তিলমানো ক্ষোভ প্ৰকাশ কৰা নাই,
সেইবাবে চাগে ইমান মৰম লাগে ।
ভাগি থান-বান হোৱা মোৰ সপোনবোৰ
বুটলি পুনৰ নতুনকৈ সজাই তোলাত
তাইজনী অপৈণত শিল্পী
সেইবাবে চাগে ইমান মৰম লাগে ।
অভিমানত মুখ ফুলাই গুমৰি থাকিলেও
কলিজা বুলি মাতিলেই ঢপলিয়াই অহা
তাইজনীৰ বুকুত মোলৈ অনন্ত ভালপোৱা,
সেইবাবে চাগে ইমান মৰম লাগে ।
আজীৱন তোমাৰ সুখ-দুখতেই
সমভাগী হ'ম বুলি কথা দিয়া তাইজনী
আজি মোৰ প্ৰাণৰো প্ৰাণ,
সেইবাবে চাগে ইমান মৰম লাগে ।।
